Video
Read full review
2023-09-10
61 views
星期六朝早，落到樓下，見到美心門口出面貼咗通告，話於月中結業，見到咁嘅情況，諗住食埋個告別早餐啦，入到去，睇個餐牌，無樣想食，再望下張張檯都有人不特只，水吧仲有好幾個人等緊，見到咁嘅情況，當然即縮，行過隔離譚仔，睇吓有無咩啱食。譚仔由佢起尖沙咀第一間舖頭開始，一直都唔係我杯茶，所以甚少幫襯，早餐更加未試過。是日由出面望入去，得小貓兩三隻，入座率約莫兩成，同午市情況大相逕庭，所以無咩期望，但從門口睇睇吓個餐牌，咦！佢個湯粉麵早餐，唔單只有餐肉、火腿、雞蛋呢啲例牌嘢，仲有豬膶同鮮牛肉可以揀噃，而且價錢又唔貴，雙併湯麵加熱飲都只係$36，咁就一於入去叫呢個茶記甚少有供應嘅組合啦！入到去坐低，唔單只客少，就連店員都唔見有，就連收銀個位都唔見有人，不過半分鐘唔夠，就有店員從廚房出嚟，咁我快快落單，叫咗個鮮牛豬膶丁麵外，仲叫咗杯奶茶。可能由於無咩客嘅關係，上餐速度算快，唔使5分鐘，碗麵同飲品都已經送到，同午市要平均等15分鐘相距甚遠。奶茶個糖包係砂糖包，但我喜歡用啡糖配奶茶，於是問店員妹妹有無啡糖，佢話有，而且好有禮貌換畀我。先講杯奶茶，質地算係滑，但茶嘅味道，我就唔係好接受到，佢未至於好似大家樂
譚仔由佢起尖沙咀第一間舖頭開始，一直都唔係我杯茶，所以甚少幫襯，早餐更加未試過。是日由出面望入去，得小貓兩三隻，入座率約莫兩成，同午市情況大相逕庭，所以無咩期望，但從門口睇睇吓個餐牌，咦！佢個湯粉麵早餐，唔單只有餐肉、火腿、雞蛋呢啲例牌嘢，仲有豬膶同鮮牛肉可以揀噃，而且價錢又唔貴，雙併湯麵加熱飲都只係$36，咁就一於入去叫呢個茶記甚少有供應嘅組合啦！
入到去坐低，唔單只客少，就連店員都唔見有，就連收銀個位都唔見有人，不過半分鐘唔夠，就有店員從廚房出嚟，咁我快快落單，叫咗個鮮牛豬膶丁麵外，仲叫咗杯奶茶。
可能由於無咩客嘅關係，上餐速度算快，唔使5分鐘，碗麵同飲品都已經送到，同午市要平均等15分鐘相距甚遠。奶茶個糖包係砂糖包，但我喜歡用啡糖配奶茶，於是問店員妹妹有無啡糖，佢話有，而且好有禮貌換畀我。
先講杯奶茶，質地算係滑，但茶嘅味道，我就唔係好接受到，佢未至於好似大家樂咁偏酸，但個味道唔似一般茶記飲到嗰隻味，我會形容係味道怪怪，但未至於抗拒，當然，基於我唔希望浪費食物嘅原則，所以最後都一飲而盡，但下次再幫襯嘅話，好大機會會轉飲其他。
至於碗麵呢，第一啖時，麵質偏硬，明顯未熟透，咁可能同出餐速度快有關，但亦可能係考慮若果啲麵如果一開始就煮得熟透嘅話，隨時間轉變，到個客食到最後會過熟，唔好食，所以寧願煮得生啲都未定。點解我會咁理解，因為我食到差唔多最尾嘅時候，啲麵真係熟透，質地符合我要求。
鮮牛肉煮得過熟，嚡口，唔得鬆軟，可能佢無完全醃製過都未定；相比之下，豬膶就好食得多，軟綿綿咁，唔會太生，有血水出，亦唔會過熟，硬口柴皮，煮得恰到好處，直得推薦。
而成個餐最精彩嘅，肯定係個湯，咪以為味精湯一定唔好飲呀，即使味精湯，原來都可以好好飲㗎，呢個湯除咗有丁麵嘅湯外，由於豬膶會用薑絲醃製，薑絲配丁麵湯包，原來係咁夾，咁好飲，所以我都多忍唔住飲幾啖。
話就話屋企煮平過出街食啫，但若果忽然想食碗豬膶麵，唔通會買嚿豬膶返嚟煮幾餐？但我就肯定唔會咁做，一嚟醃製功夫未必到家，更重要係好多食材唔可以擺起雪櫃太耐唔食，所以對於偶然一次食，又唔可以擺太耐嘅嘢，我寧願出街食。
最後值得一提嘅係，我幫襯呢間譚仔，啲店員好有禮貌，會講歡迎光臨呢類客套話，清潔張檯嘅速度好快，食完無幾耐就即刻收拾好，而且做嘢速度亦快，唔似得兩大一美及老麥咁，遲遲無人嚟清理，即使有人清理，個速度好似烏龜咁慢。食完早餐，返到屋企同家人講，佢都同意我話呢間譚仔員工好有禮貌嘅睇法，原來呢間分店，唔單只朝早無乜客時咁有禮貌，即使中午繁忙時間，啲員工都好有禮貌，抵讚！
估唔到小貓兩三隻嘅譚仔，原來可以係開心大發現，我諗呢間譚仔，我好大機會再嚟食早餐。
Post
