滿記甜品 (Moved) New Location

至怕大時大節，要約朋友出街食好難，個個都陪另一半，呢日情人節如是無咩細藝，人人有形皆雙，同老死收工求期食個便飯，就行下花墟消磨時間。但成晚流流長，係旺角見到一街都係放閃的人，差在未到核爆級，老死提議下半場，去食糖水。喂，今晚大把糖水鋪爆架啵大佬，有幾多情侶唔會食飯後甜品呀。由是只係晚上8點，實在係漫漫長夜，於是決定揸車入西貢兜下風同順手吔個甜品。兜風都兜左一個鐘到，9點已到無咩人掛，客唔算好多，可能時間尚早。肚又可以餓，點左3樣，榴槤班CAKE、楊枝金露同另一個唔記得咩叫名既芒果東東。榴槤班CAKE無咩特別，由內而外都係好普通既層次口感，CREAM亦唔多，皮是淋的(帶有點滲水既濕意，離奇在食到有少少微碎冰粒)。楊枝金露都係OK程度，無特別，就係一般其他糖水鋪都食到既味道，無話餡料特多。反而係唔記得左名果個芒果東東就有點新意，相對地無咁普通，芒果肉甜而多汁，底既耶汁冰亦好綿而香甜，呢個整體唔錯。總說，甜品不過不失，不是特別好味要跑入黎非吃不可程度，唔係唔好味，同普通甜品店食到既味道差不多，應該係勝在那種環境風味，食完行下西貢碼頭夠寫意，要的，就是這種感覺。