Y Show Tasty (Closed)

55度慢煮南美風羊西冷配可可寶雲酥第一次食呢款菜式，原來係用麵包糠、醬料同香草舖上羊架再焗，切開羊脂同羊肉分佈分明，入口甜甜辣辣，又有脆脆一粒粒既麵包糠，口感豐富。羊肉肉質軟嫩，好易切，本身55度就大概係5成熟，但我地希望7成左右餐廳都話可以。伴底有燒茄子，都好好味，有油香軟腍腍，加埋羊一齊食又有另一番滋味。追加$68蒜片辣椒白酒煮意粉，值得加，因為真係好味，唔會太乾身，有蒜味又香辣，好惹味。咁樣就配出1個羊肉意粉!火焰雪山我又係第一次食火焰雪山，大部分黎既人都有點呢款甜品。店員會拎住點著火嘅酒，淋上雪山等佢慢慢燃燒，佢燒既程度係岩岩好微焦，好似BBQ左既綿花糖咁，呢個就係微焦既蛋白。鬆厚嘅蛋白原來仲包住朱古力蛋糕同雲呢拿雪糕，仲有士多啤梨同藍莓既鮮果配搭中和甜味。完全做到個隻冰火既口感，一班朋友黎最岩食呢個甜品，又岩晒打卡。精選特色蛋糕，當日係藍莓芝士蛋糕，呢款cake一D都唔漏，好香濃芝士味，藍莓醬又岩岩好清甜，非常不錯。