鮮入圍煮 (Moved) New Location

香港人特別鍾意打邊爐最近聽朋友講話旺角有間餐廳食花膠雞湯好出名又好味，當然第一時間要同老公去試吓啦。嚟到我哋第一時間叫咗個花膠雞湯，個煲黎到我同老公都嚇咗一跳因為啲湯渣入邊真係有大大嚿嘅花膠同埋好多雞件，侍應推薦我哋先飲一碗雞湯再放配料落去打邊爐，首先飲吓個湯頭真係超級濃郁啊！而且飲落一啲都唔口乾非常適合女士補下骨膠原。嗰度嘅點餐紙有好幾張配料選擇都非常多，而且仲有啲新鮮游水嘅海鮮俾你即場選擇添。另外配菜方面今次我哋叫咗牛湯汁濃湯牛丸，炸響鈴，芒蜆同埋帶子水餃，因為成個煲嘅配料已經有好多雞件同埋花膠我地怕兩個人食唔晒就唔叫咁多啦，首先講下個牛丸食落好彈牙而且好Juice！另外個帶子水餃係平時比較少食到嘅入面真係有一粒粒嘅小帶子而且皮薄餡靚不過我就覺得啲餡料醃得偏鹹咗少少，同埋個響鈴食落好脆口同埋份量都幾多下，最後個芒蜆真係冇得輸！隻隻都好大隻而且好肥美食落好鮮甜。