小神燈新派飯館 (Closed)

📍彩明呢間小神燈新派飯館就咁睇門口都幾多玩味搞作，同平時見到嘅粵菜餐廳好唔同，晚市出咗特價晚餐試一試。一入到去就會有餐前小食，係泰式酸辣鳳爪，已經去晒骨食落都幾開胃。我哋再食埋椒麻鮮螺片($48)，螺片都好大塊，底下仲會有青瓜。朋友想食小炒，叫咗份比較少見嘅廚皇炒鵝腸($138)。鵝腸爽口同埋好香豉椒味，仲有三色椒同生洋蔥，而且炒得唔算好油。菠蘿咕嚕肉($98)就正正常常，外皮脆口，入邊嘅肉都唔係好肥，酸酸甜甜係我哋最鍾意食嘅小炒之一！最期待就係糯米炒膏蟹($428)，呢個係即叫即整，都等咗差唔多大半個鐘，一上枱就見到原隻膏蟹冚住糯米飯！膏蟹炸完之後更加惹味，旁邊仲會有鉗仔方便我哋食蟹鉗，糯米飯份量都多，如果更加濃味啲加埋少少臘味就好。