東寶小館 (Moved) New Location

朋友對大排檔情有獨鍾，為食嘅我其實食咩都無所謂，聖誕大餐 crossover at 大排檔，簡直係正！食得東寶，等位簡直係必然嘅事，但朋友好好，準時六點收工去拎位，佢話唔夠一陣就已full。之後兩個人叫左五碟送，飽到呢⋯⋯⋯⋯先講炸墨魚丸，熱辣辣好彈牙，加埋少少少酸甜汁，有酒樓去飲嘅感覺，唔錯！之後就上東寶馳明風沙雞，粒粒炸蒜頭蓋係半邊雞上面，D肉鮮嫩，唔會炸到「鞋」晒，層皮亦都脆口，呢個係必叫之選。太多肉點都要叫番碟菜中和番，所以就揀XO醬炒白菜，原來都幾辣，可能我自己較為鍾意食細條白菜，所以OK啦！其實碟墨汁魷魚麵，係見人叫我地先叫，但可惜只係有外表，無實力。朋友形容第一啖偏咸，之後魷魚又唔太新鮮，並不太彈牙，所以佢唔太鍾意。去到尾以咕嚕肉作完場，普通，個菠蘿我就覺得好酸，但朋友就覺得ok，而肉我就覺得粉漿太重，雖則係炸到好脆身，但其實係無肉食，好可惜。整體服務同味道我都覺得係ok，但五碟送，份量偏少，但食左七百幾蚊，不過朋友都話，下次試其他送！