同撈同煲 (堅拿道西)

Open Now

Now Closed

九龍城人氣火鍋店開到去銅鑼灣，以懷舊六七十年代嘅香港為主題，裝潢獨特，適合打卡。食物方面主打多款特色火鍋料理，除此之外更有刺身、海鮮、點心、小食、甜點、飲品等供應。火焰醉雞煲賣相一流，無得選擇辣度，雞塊煮至入味但唔會過鹹，另可加點要豆卜等配料去炒，建議可以自己額外落埋蔥同芫荽，會令到整體口味昇華咗，性價比高，值得一試🤣 火鍋配料選擇豐富，最特別嘅莫過於點心類別，從未試過攞嚟打邊爐。醬汁鳳爪有四大塊，吸滿湯汁，皮Q爽彈、鵪鶉蛋燒賣超級大粒，餡料飽滿，好飽肚、灌湯小籠包可愛迷人，外層稍微厚但勝在咬落爆汁。記得留肚食呢度嘅前菜同小食，款色多樣化，大件夾抵食。特別推介妃子笑，外層脆身，內餡彈牙、雞軟骨帶咬口，炸至酥脆，搭配椒鹽粉更惹味、即炸響鈴同老友鬼鬼一定要趁熱食！菜品方面都有唔少，簡簡單單要咗番茄同唐生菜，新鮮，鮮甜，健康，美味。最後以甜點作結，有自家製嘅鯉魚造型糖不甩，即場用食完嘅湯底煮再沾上花生糖碎食，口感煙韌、另有插住把遮仔嘅啫喱杯，童年回憶返晒嚟。