新華茶餐廳

Open Now

Now Closed

悠閒的星期六。以往好少機會遊覽長沙灣青山道一帶，約左位網友係附近交收，而咁啱又遇著肚餓，腦中閃過呢間餐廳，Google一下之後就黎到此店。呢間餐廳門口尚算企理，一入去就已經有幾位地道港式茶記侍應招呼，態度當然比起某間出名人多又要食得快既餐廳好百倍! 枱凳都係乾乾淨淨，裝修完全係香港人平實既風格，坐無虛席，顧客大部分應該係老街坊，正好俾我一個享受港式味道既地方。餐單種類繁多，我當然係揀茶記最拿手既常餐，內容包括沙爹牛肉麵，牛油餐包同奄列加熱飲一杯。落左單唔夠五分鐘，餐包同奄列率先奉上，包只可以算普通，熱度不足令牛油難以充分發揮所長，奄列都尚算可以，火腿絲同蛋都好飽滿，同樣地熱度強差人異。不過數秒，主角沙爹牛麵就上場，公仔麵熟度恰到好處，牛肉有嚼頭，而且沙嗲醬唔係三流貨色得個味，帶有花生香味，滿足。壓軸當然唔少得熱奶茶，茶色均勻，同奶似姻脂扣咁纏綿，杯身熱騰騰，一飲落口茶味香而不澀，奶味唔會俾茶味蓋過，香醇幼滑好奶茶!整多件蛋撻就prefect池。食既時候我都習慣留意身邊其他既食客，有情侶，夫婦同一家大細，亦聽唔到半句普通話，侍應既有禮貌，同熟客有傾有講，有熟客未坐低已經同佢地心有靈犀。當