千色車仔麵

Open Now

Now Closed

呢間位於荃灣千色店旁的千色車仔麵店, 我好細個已經開始食, 我估呢間店鋪最少開左廿年, 我記得初初食時十零廿蚊已經食到飽飽的, 佢哋啲車仔餸做得唔錯, 後來越食越貴, 加埋個肥車呔推介, 更貴, 近來已經好少嚟食, 今晚朋友話想食車仔麵便帶他來吃。小店基本冇裝修可言, 呢度唔係食裝修, 食物好味最緊要。油麵加七餸（$76）一碗車仔麵賣76蚊, 配七個餸你可以話平, 亦都可以話貴, 不同配料價錢不同, 由$8-11不等, 以前啲餸份量大大的, 叫兩個餸加一個麵已經非常飽, 而家份量细好多, 七個餸加一個麵睇落都唔係好大碗, 樣樣得幾粒。我最鍾意食佢哋嘅滷水雞翼尖及滷水大腸, 雞翼尖滷得好入味好腍, 又香又滑, 骨都腍埋, 百食不厭, 滷水大腸更加美味, 大腸肥膏少, 但滷得夠時間, 既入味又香滑, 一啲都唔油膩, 好正, 其他配料都唔錯, 好味得嚟唔會死鹹, 係老派人用時間去浸淫食物, 而不是用味增加豉油那種濃味出品, 食完都唔會太口乾的。