林記點心

Open Now

Now Closed

而家手工點心買少見少，難得呢間小店仍然堅持凌晨時段開工做點心，阿姐話佢凌晨四點鐘開工佢都唔係話唔得人驚，真心敬佩。因為坐得遠，阿姐好好人話攞啲點心俾我哋慢慢揀，佢攞咗八樣，我哋兩個人就話全部要晒，費事咁重叫佢攞嚟攞去啦，本來仲想叫腸粉，不過阿姐話食晒先再叫，如果唔係凍咗會冇咁好食，真係細心。咁多樣嘢之中最好食係蝦餃，細細粒，餃皮夠薄，有時WU係好鍾意食嗰啲巨型蝦餃，食咁大粒蝦不如我直接食鮮蝦好過啦，蝦餃就係蝦肉筍絲同埋膠皮嘅混合味道。燒賣都唔錯，傳統燒賣上面加啲蟹籽，餡料撈得唔錯。鵪鶉蛋燒賣都OK，最主要係入面粒肉新鮮彈牙唔會霉霉地嘅感覺。山竹牛肉、鳳爪同埋鮮竹卷就正常水準，都好食嘅。鴨腳炸舊芋頭就唔夠粉，雞扎無啦啦加條蟹柳就有啲奇怪。整體唔錯，可以encore。