佳記粉麵茶餐廳

Open Now

Now Closed

是日啲食飯時間調到亂七八糟，差唔多成五點鐘先食第二餐飯。經過蘇杭街，就緊係唔會錯過搵好嘢食嘅機會啦！眼利嘅阿K一眼就望到遠處嘅「佳記」。根據阿K記憶所及，「佳記」原本响舊北角碼頭度，自從碼頭拆咗之後就唔知去咗邊度，是日終於俾佢撞番。一入到舖頭入面，就俾「竹昇手打麵」呢幾隻字吸引。見下午茶餐仲有得供應，我就二話不說嗌咗一碗豬手麵加咖啡。豬手已經炆得好腍，可以一路食一路啜關節附近嘅軟骨，十分好食；手打麵不愧為手打麵，麵質煙韌又有麵味，一啲梘水味都冇，屬於上品；咖啡係即磨咖啡，咖啡味好香好醒神，唔似普通茶餐廳嘅酸到死翻煲咖啡。阿K叫咗碗雞脾公仔麵，雖然炸雞脾都整得唔錯，但相比之下冇豬手麵咁印象深刻。一個下午茶餐只係十八蚊，已經有麵食同即磨咖啡飲，抵過咖啡連鎖店廿幾蚊一杯嘅咖啡好多，而且手打麵一啲都唔馬虎，是去食下午茶餐嘅不二之選。