富都餐廳

Open Now

Now Closed

搬左舖第一次黎食，餐牌無乜變喎，新餐廳大左光猛左，感覺唔錯。下午茶時段黎唔算好多人，最後有幾張卡位仲係吉嘅，坐低左即刻落單先，好肚餓呀。先來杯紅豆冰同凍奶茶，紅豆沙好多豆呀，煮得軟腍，甜甜地好味，個人黎講唔覺得過甜啱啱好呀。朋友杯凍奶茶走甜，茶香奶滑好飲。下午茶的乾炒牛河，好受歡迎好多人點㗎。份量正常，即叫即炒熱辣辣。牛肉鹹香，河粉彈牙，而且唔算太油，有水準之作。另一份叫左炸雞翼沙律，嘩，隻雞翼好香呀。賣相幾靚喎，個沙律有裝飾過。雞翼炸得香口，連沙律食覺得無咁熱氣，哈哈。個沙律都好好味，有蘋果，薯仔，青瓜，雜果等，醬汁酸酸甜甜，好耐無食過呢啲香港特式先有嘅雜果沙律啦。之後再加左個豬扒包，同樣係新鮮做熱辣辣的。包面同包底都有塗上牛油，加上熱溶左好香唔，豬扒軟嫩，加埋洋蔥汁勁好味，唯一唔好就係有骨，懶人嘛梗係想啖啖食。整體食物質素提升返去舊舖新開張時的水準，價錢親民店又好坐，有下次。