神輿日本料理 (Closed)

正當諗緊今晚食咩好嘅時候，就見到呢間神輿嘅廣告牌，咦～放題唔算貴，而且相又幾吸引啵，就黎試下先。位置就係喺創興廣場，陣間食飽就可以喺門口搭巴士返屋企，哈哈一開門，門面好光猛乾淨，門外有d許願牌。再行埋入去，好似去左日本神社，內裝修風格清晰，現代感強，俾人舒適嘅感覺。食物都幾多款式，有炸物，壽司，主食，一品料理，串燒，刺身等等。叫幾多黎幾多，唔會俾少。而且上菜快，收拾速度亦一d都冇怠慢，真係值得一讚呀!刺身賣相唔錯錯，三文魚，吞拿魚腩，象拔蚌，甜蝦，北寄貝都肥美鮮甜，呢個價錢有呢種質素絶對有驚喜。壽司同手卷，細細件，唔會好快飽，咁就可以試多幾款😊芝士焗虎蝦，芝士夠多，唔鹹，好味道。海膽炒飯好香，炒得夠乾身。Sukkiri白桃汽酒/巨峰汽酒，酒味唔濃，好香果味，唔識飲酒但又想試下嘅話絕對可以飲呢個，豬喜歡飲白桃。甜品方面叫左個綠茶同紅豆雪糕，奶味濃郁，紅豆味似呀菠蘿雪糕屋嘅紅豆霸，而綠茶唔會苦，2個都好味。＄228再加一，地方企理又舒服，刺身夠新鮮，壽司精緻絕唔馬虎，飲品高質素，唔係平嘢，呢個價錢享受到咁高質又真係唔錯。