煮道 (Closed)

近期寒風刺骨，邊爐癮不斷，今日終於搵到腳。唔係朋友食過，係條街度真係唔會留意到呢間舖，事關間舖係2/F, 招牌寫uniboil，齋睇個招牌仲以為食西餐，真係估佢唔到有邊爐打，完全係睇唔出有邊爐打囉。邊爐似日式，但居然有麻辣湯底，最啱鍾意食辣嘅人。邊爐係一人一爐方式，既衛生又啱我呢啲成日搵唔到腳嘅邊爐怪黎止咳。另外，夜晚要係上環搵食都唔係易事，仲要搵邊爐真係難上加難。最後我地點左一個麻辣湯底嘅牛肉鍋同咸蛋南瓜湯底嘅豚肉鍋。100左右一個鍋，仲要有好多料，以上環呢個貴價地段，點搵呀。麻辣湯底真係夠麻夠辣夠惹味，至於個咸蛋南瓜湯仲正，怪不得朋友極力推介。南瓜湯底就見得多，係未見過加左咸蛋嘅南瓜湯底。飲落口有甜甜地嘅南瓜味，又有淡淡嘅咸蛋味，直頭可以當湯飲。火鍋料嘅牛肉同豚肉都好新鮮，又肥瘦適中。唔似大XX果啲，湯底又無味，啲肉又齋肥。鍋裡面仲有好多肉丸，平時都好鍾意食芝士丸，但發覺呢間啲芝士丸好似唔同啲，特別濃，啱晒我呢啲芝士粉。另一個值得推介嘅係佢其中一隻丸，若果無食錯，係有生姜皮蛋係裡面，好得意。因為我同朋友都鍾意食辣，所以另外加點左個口水雞，好驚訝有機械人侍應黎捧餐，唔知係咪少出街食飯