泰妹餐廳 (The Wave) (Closed)

出開去觀塘做嘢，通常我都會去工廈搵食，因為唔駛吓吓食連鎖店，有時會發掘到啲隱世美食，見到呢欗工廈好似幾型格咁，咁啱又想食泰國嘢，於是就上去試吓。餐廳走簡約風，唔會有好華麗嘅裝修，但正值中午時間，比較多人，所以都等咗陣。午餐叫咗冬蔭公大頭蝦海鮮湯麵，有時好怕啲冬陰公會好咸，呢度唔會，配埋湯麵剛剛好，除大頭蝦外，仲會有啲蜆同魷魚，湯麵加埋啲芽菜一齊食，好清爽。另外叫咗海南雞飯，雞肉好滑，飯係用香料乾蔥同煮，但唔會話好油，最正係啲汁，我鍾意點晒3隻醬，又甜又酸又辣，用嚟撈飯同點雞肉都得。青檸梳打有淡淡青檸香，好清新。泰式奶茶係少甜，都幾啱我。呢餐兩個人埋單都係$100左右，都算係抵食。