囍 (Closed)

已經食過囍好多次，今次同同學聚會，又再揀返呢間火鍋店一路都覺得呢到嘅椰子雞煲好好食，而且價錢都好親民，以下係餐牌：$138一人係有豬同限量嘅雞，$148係豬、牛、雞任食。另外出面仲有好多配料任夾，有蕃茄、金菇、不同款式嘅菜，之前有一次黎食過仲有秋葵添。大約7點都仲未有好多人，之前試過如果唔係好滿座嘅話，係唔會計住要你90分鐘就走，可以食到兩個幾鐘。不過今晚好多人訂枱，所以都係要90分鐘食完餐具等等都非常整潔。因為椰子雞出名，所以一黎就有埋沙薑同埋青檸汁，食嗰時記得落呀！我地嗌左$148一人，試左壽喜燒湯底，但因為太咸，所以要係咁飲野，飲飲下都飽。建議大家如果叫都係叫返木瓜椰青湯底，煮雞真係非常好食！雞件任何一部分都好滑，正！醬汁選擇都非常多，有齊炸蒜，普通蒜，七味粉，蔥，辣椒，麻醬等。呢到仲有好多得意小食，例如呢個就係綠茶麵，其實食落去唔算好有綠茶味，但個樣都幾靚幾得意計埋加一，每人都係食左163蚊，價錢唔算好貴，食物種類亦多。另外如果平日黎基本上都唔洗等位，地方好闊落，完全唔會好逼！