拉麵Jo (Closed)

今日約了朋友在圓方睇戲，睇戲之前當然是醫肚，但朋友臨時有事要開場才到，唯有自己食先，在商場逛了一陣，去到水區見到有拉麵Jo，早前經過銅鑼灣時都想去試，但當時勁多人排隊，所以打消了念頭，雖然現在只是6:30pm，但已經差不多座無虛席，好彩我得一個人，啱啱門口有個吉位，侍應便帶領我坐低。餐牌上的拉麵款式不算太多，我點了「特製蒜油豚骨拉麵」來試試，不消十分鐘，侍應便捧來了一碗熱騰騰的拉麵，拉麵賣相不錯，細心呷了一口湯，味道鮮味濃郁，帶點稠身，但有點偏鹹。餸菜除了有豚肉、溫泉蛋外，還有一粒令人驚喜的鵪鶉蛋，平時吃拉麵也不常吃到的啊，而配料就有紫菜、椰菜、竹筍及木耳絲等，紫菜較一般厚身，不易碎散，浸過濃湯後，入口更是美味，而椰菜清爽可口，能減低濃湯的黏稠，配搭得宜。整體來說，食物質量是不錯的，但＄120 （加10%服務費後）一碗拉麵又好像有點貴，不過若計埋地點、服務質素，這個價錢也是可以接受的。