匠一麵屋 (Closed)

之前喺Facebook見到長沙灣有一間拉麵店只要加$30就可以任食拉麵嘅配料，所以專程過嚟試吓。嚟到見到有一條都幾長嘅人龍，但係既然專程嚟到，咁唯有排隊食啦。店內嘅座位大概有廿零30個，雖然係放題但係大家都唔會食好耐，所以排隊都唔使排好耐。最平嘅拉麵就係醬油拉麵， $65就有一碗。至於任食嘅配菜本身有半熟蛋嘅，但係可能我哋去到已經比較晏，所以店員就話半熟蛋已經賣晒冇得做放題。但係我哋仲可以食叉燒，可以加面，心知乎加白飯，另外仲有餃子同埋炸雞都可以食。依家食一碗拉麵$100左右，但係呢度比$100左右已經可以食到放題，都幾抵。我哋分別叫咗一碗醬油拉麵，同埋一碗豚骨拉麵。比較有驚喜嘅係呢度嘅醬油拉麵同埋豚骨拉麵竟然係用唔同嘅拉麵。豚骨拉麵嘅面係比較幼身少少，口感爽啲，而醬油拉麵嘅面就相對粗少少，口感比較淋啲。我自己就鍾意食豚骨拉麵多啲，但係女朋友就鍾意食醬油拉麵多啲，所以真係好睇個人口味。不過拉麵水準又真係唔錯嘅。餃子四隻一份，份量幾適合，唔算太多。不過略嫌餃子煎得唔夠乾身，唔係幾脆口反而炸雞就真係好正，首先佢嘅醬汁係加咗蛋沙律嘅，好特別，另外雖然淋咗醬汁喺面，但係啲炸雞仲係好脆口。