波記(大排檔) (Closed)

有事求救，就約老頭子出來，天氣轉涼，就按他的意見來波記。地痞後巷，環境較水記好少少，兩個巨型火爐，馬力十足，爆起上來的話附近行人頓變燒豬，這兩個爐，尋遍港九也只有波記，又是香港的文化遺產。雖說轉涼，但都幾熱，佩服兩位大叔整日面對著熊熊烈燄，亦面不改容；客人落單後，阿姐即時遞上執好的料，瞄瞄埋邊檯面，一盤盤的材料，都是執定貨色，要炒牛河就遞盤牛肉來，要炒三絲，就遞盤肉絲來，大火泡製，唔洗45秒，炒粉麵飯即是送出，鑊氣十足。未開口，老頭子已搶先叫了星洲炒米、豉椒炒牛河走油，一乾一濕；星洲炒米，銀芽、肉絲、蝦粒，料唔多，叫了走油結果濕淋淋，微辣但唔香，一般；豉椒炒牛河，是濕炒，青椒、豉粒、紅椒、洋蔥加上醃得唔多入味的牛肉，配料、汁水十足，可惜無豆豉及青椒的香味，如過可以先爆香蔥同豆豉會好好多。邊食邊睇著大叔舞弄著大鑊，都幾壯觀，呢類「大火頭」的街邊檔，執一間少一間，縱然食物質素談不上一流，當上文化堂，掏廿塊錢來參觀，見識什麼是本地文化。