榕基滷水專門店 1992 (Moved) New Location

舖頭瀰漫文青氛圍，完全唔似係賣滷味食物。套餐以托盤上枱夠企理，應該花過心思選用碗碟，色調跟食品顏色相配，悅目喔，整體感覺似去咗台北日式小食店。滷水汁香而不過鹹，鵝有鵝肉的獨特香味，肉實夠入味。擔心老友記食唔到鵝，叫埋牛展併豆腐做後備，結果佢兩様通殺。鵝件大細適中，有啲係全肉，有啲帶骨，啱晒佢唔使吓吓啖啖肉。白飯份量足，略嫌冇飯香同較軟身；手工湯麵軟硬度適中，清湯入口唔口渴。老友記加麻辣醬再倒入點鵝食的醋汁，自製酸辣味。三小碟中點食魚仔同青瓜，前者得兩票，青瓜輸在冇咗爽脆口感。單點滷鵝腎同話梅花雕雞軟骨。厚身鵝腎帶紅心賣相靚，入味唔韌，送酒一流。花雕汁鹹咗啲，亦食唔到話海香，老友記食咗幾粒雞軟骨就放棄，激死禾。