沙田新強記燒鵝海鮮酒家

Open Now

Now Closed

一家四口一齊去食飯，因為爸媽都話想食燒鵝燒乳鴿，所以去左大圍好出名既新強記晚餐。新強記係歷史悠久燒鵝老字號，門口有大紅燈籠高高掛，仲有一大隻強記鵝歡迎大家入去食飯。餐廳超級大間，好中國風，一睇個外形同內籠就感覺到勁有古色古香feel，連碟都係古中國畫，靚！我地散叫，無選到套餐。新強記燒鵝皇（例）$170係鵝脾位，very good！鵝肉連住一啲肥膏同骨所以嫩滑。鵝味濃，沾醬食更美味。金牌燒乳鴿 $58叫左2隻，每人食半隻。乳鴿雖小但我覺得算係多肉食，好香好香，要襯熱食！椒鹽九肚魚 $108咸咸地好好味，個炸皮薄脆，魚肉超軟滑，香口度十足。香桃咕嚕肉 $128酸酸甜甜好開胃，即刻叫左白飯一齊食。咕嚕肉啖啖肉，食得出係即叫即做，絕對唔會係出面其他餐廳翻炸再翻炸既肉乾。紅豆沙甜品係送既，凡進餐都每人一碗中式糖水，全家都選擇左紅豆沙。紅豆沙個糖水係水狀，紅豆粒粒分明。我鍾意呢款紅豆沙，一啲都唔稀，濃紅豆味，仲食到陳皮味，食紅豆時有得咬下有口感。