燒洒一族 (顯徑街市)

Open Now

Now Closed

燒洒一族係一間新派燒味鋪，佢除左常見嘅叉燒同燒腩仔之外，仲多左啲西式野同酒醉冷盤小食，好似德國咸豬手、法式燒春雞、花雕雞、酒醉腎片......等等。做冬冇得出去食飯，就去左親戚屋企一齊過節，佢地就住喺附近耐唔耐都有幫趁燒洒一族，所以今次都指定我黎哩度斬料加餸。德式燒豬手($95/大) - 豬手外賣返到黎個皮仲好脆，豬手肉質唔會太硬，帶少少咸味，我自己就鍾意蘸埋芥辣食，同出面餐廳一樣，哩度嘅豬手都有跟酸菜，一舊豬手一啖酸菜冇咁滯。慢煮醬烤豬肋骨($58/大) - 豬肋骨已經切好左一件一條骨方便食，醬汁甜甜地唔會太多醬食到滿頭滿面都係，肉質雖然唔算好腍離晒骨，但都唔會太韌唔會痴牙。香草法式燒春雞($65/隻) - 燒春雞一隻都幾大隻，雞件上面仲見倒少少香草，春雞醃得幾入味又唔會太咸，肥瘦適中肉質唔會太鞋。香甜蜜味烤雞脾($20/隻) - 雞脾啖啖肉加埋甜甜地嘅蜜糖基本上都冇得輸。酒醉溏心蛋($18) - 留意返溏心蛋係一份份買，冇得逐隻買。溏心蛋食倒少少酒味，不過蛋黃就熟左少少，如果再流心啲更好。