金淼 (Closed)

飯，都真係亂食；呢碗飯，就夠銷魂。明明係主打「火系」嘅日式鐵板燒料理，餐廳名偏偏就「旺水」，五行八字，唔知箇中有冇玄機呢😂？講返正題嘢食先！日本料理之中除咗Omakase，仲有teppanyaki都可以近距離睇師傅表現。如果你覺得睇碗炒飯好普通，咁你都錯唔晒，因為佢真係望落普通，但抓入口會wow出聲！碗飯大有來頭，用咗靜岡銀稚魚喺鐵板上猛火快炒，飯粒粒粒乾身爽口，簡單調味入口就香氣四溢，係食材質素亦係👍🏻廚師炒飯水準高嘅肯定。成個lunch set極度大滿足，前段分別有蟹肉茶碗蒸蛋、北海道銀鱈魚、仙台產虎蝦🦐同美國安格斯牛肉薄燒🐃，一個人獎勵自己嘅一餐，食得異常滿足。銀雪魚煎到剛剛好！特別要讚拌碟嘅魚皮好香脆！魚肉好嫩滑！安格斯牛肉薄燒包住煎香可口嘅蒜片，加少少海鹽同胡椒簡單調味就經已好出色！食落層次更豐富。配菜用咗比較少見嘅龍珠果，入口爆酸正好去油解膩，再食件日本白色甜粟米中和口中酸感。靜岡銀稚魚炒飯，入口啖啖都食到銀稚魚，飯都炒乾身，粒粒圓潤又分明！漬物係酸蘿蔔、洋蔥、水雲、 青瓜，酸咪咪開胃！麵䜴湯同甜品芝麻雪糕就正常發揮！