發哥粥底海鮮火鍋 (Closed)

家人想食海鮮，我想食火鍋，一於食海鮮火鍋😂。觀塘呢間發哥粥底火鍋幾隱世，門口係普通茶餐廳咁嘅樣，望真啲先發現係朝早茶餐廳，夜晚打邊爐，因此座位好多都係卡位，坐得好舒服。首先上枱嘅係燉湯，打邊爐都有原盅燉湯飲，好滋補。湯非常足料、鮮味，正👍第二樣係泰式青口。青口上枱熱辣辣，配蒜蓉和泰式醬，甜甜地，青口鮮甜唔腥，好食😋食到第三樣都未開始打邊爐🤣！冰鎮鮑魚肉質緊實，但係一啲都唔韌，彈牙有驚喜。終於開始打邊爐，米水湯底係冇味嘅，一開始要靠醬料幫忙，好彩海鮮夠新鮮，鮑魚非常活潑，仲喺隻碟上面打交，新鮮到飛起！所有海鮮都洗得好乾淨，全晚冇食到一次有沙，而且新鮮就唔使夾硬淥好耐，保持到肉質有彈性。蝦幾新鮮，顏色鮮艷，咬落去仲有爽脆嘅感覺。特別推薦墨魚滑和墨魚丸，一定係自家製，既有海鮮嘅鮮甜味，又有一粒粒墨魚口感，超正。配料都有質素，安格斯牛肉好濃肉味，魚皮香脆，蔬菜新鮮。最後加粥底料煲粥，精華所在，為呢餐寫下完美句號。