稻香超級漁港 (南豐廣場) (Closed)

過幾日就中秋節，屋企人決定提早慶祝，地點揀咗最近長輩居住嘅將軍澳，訂咗位於南豐廣場嘅稻香。去到等早段食客交枱後入座，嗰度枱比較窄，因為有小朋友亦有Bb，推bb車要麻煩其他食客讓位置經過。可能臨近節日，而呢度價錢亦算抵，但係酒樓人手真係太少，我哋每次叫職員舉手5分鐘都無人理，多次要離座搵職員。飯我哋由上第二個菜已經叫，到上尾二個菜先嚟，重要有啲生，所以無食到叫職員收咗。蒸魚係食完所有嘢再等15分鐘先嚟，全程好無奈。食物方面份量及味道可以，而且價錢相宜，另外每位加$14可以任飲任食自助吧嘅飲品同甜品，選擇都唔少，有汽水，豆漿，清熱茶類，杏仁茶，雪糕等等。稻香燒鵝皇，份量夠，又唔會鞋口，唔錯。熱石脆皮乳豬，都係傳統燒乳豬好味啲。沙薑雞，雞肉算嫩滑亦唔會太鹹。上湯蝦球伊麵，蝦球大大隻夠爽口，不過無咩鮮味，伊麵炆得夠入味，汁夠多。紅燒豆腐同魚滑野菌浸菜苗都兩都普通。西蘭花炒帶子，帶子大大粒夠鮮味。蝦醬鮮魷圈炒通菜，我食到係鹹魚味同有鹹魚嘅骨，鮮魷唔太多但好大件，幾惹味。等咗好耐嘅清蒸龍躉仔肉質鮮嫩。