意粉廚房

Open Now

Now Closed

年紀大，食唔到咁多，近年越來越鍾意食半自助餐，一個main dish，加餐湯甜品，足以滿足食慾之外，價錢百零兩百亦相當合理，美中不足係好多半自助餐都無杯餐飲，令我呢類「茶餐廳鬼」最後又要額外買杯嘢飲。今日去咗尖沙咀一間酒店內嘅「意粉廚房」，見佢餐牌都有唔少選擇，有牛’有魚’有海鮮，即使賣相未必算達到酒店水平，但係價錢亦唔係酒店級數，相當合理；最估唔到係餐湯同餐飲任飲，仲得了嘅？事關我係「茶餐廳鬼」之餘，亦都似「餐湯怪」，有時揀餐廳食，就係為咗個湯，呢間嘢個湯達到酒店級數，令到我今日飲咗3碗，之後餐飲亦添咗一次，個人覺得，只要唔係特別想食甜品，呢度係十分理想嘅「半自助餐」，而且價錢係$100都唔使，性價比絕對無懈可擊。其實，個主菜都值得講一下，我叫咗個最穩陣嘅三文魚忌廉汁意粉, 口味相當好，忌廉汁都算清新，三文魚就正正常常，以咁嘅價錢，仲要係尖沙咀；如果計埋無限添「飲」，真係無得輸。