樂園魚蛋 (亞皆老街)

Open Now

Now Closed

晚市重開後經常出街食飯，又火鍋又燒肉，所以近日想食清淡少少，粉麵類就岩晒啦！今晚同朋友去開旺角，經過呢間 「 樂園魚旦專家 」，睇到門外餐牌有粉麵飯而且內裏環境光線充足、整齊乾淨，地方大唔會逼夾，一於就喺呢度食嘢啦！呢度叫得魚蛋專家，當然要試吓佢啲魚蛋，但我貪心啲要試晒四款丸！《 樂園四寶丸 配河粉 $45 》+ $5 紫菜 有黃金片頭、魚蛋、墨魚丸、魚皮餃同牛丸。黃金片頭同魚旦都爽彈，魚皮餃啲皮煙韌，咬開唔會油笠笠，牛丸爽口，墨魚丸口感唔會粉。湯底清香，唔會令人好頸渴。紫菜洗得乾淨唔會有沙。《 金牌豬手 配米粉 $36 》豬手炆得好夠腍，豬皮爽彈好有膠質感，啲肉都嫩腍易離骨。朋友鍾意食辣，所以佢加咗辣醬，連埋啲湯變得少少辣，佢話幾惹味。兩杯 《凍檸茶少甜 $8 x2 》 都抵飲。喺旺角30幾蚊就有碗粉麵，都算幾抵食，而且比一般粉麵店坐得舒服，下次再嚟。