Greyhound Café (MOKO新世紀廣場) (Closed)

泰式炸蝦、魚餅球 $98，蝦餅質感彈牙爽口，但蝦味唔夠突出，炸得香口。魚餅同樣彈牙，而且魚味濃郁，香料味不重，幾易接受，配搭花生碎同醃青瓜粒都幾有咬口。不過份量少，味道無驚喜。特色家鄉羊肉串 $98，用泰北煮法，有家鄉香料風味，羊肉配洋蔥、乾辣椒及青檸汁配搭，味道辣中帶酸，醒神開胃。份量雖然少，羊肉幾嫩幾多汁，不過羊羶味太勁，唔係人人食到。啖啖鮮蟹肉炒飯 $188，配中式清湯。炒飯用蒜蓉、乾辣椒、蟹肉炒泰國茉香米，炒得幾乾身，但連蟹肉都偏乾，辣度幾到位，但咸度不足，要加旁邊的魚露增加咸味同鮮味。清湯偏咸，有瓜同豬肉粒，味道一般。幸好整個飯份量都幾多，夠飽肚。