LA Restaurant & Dessert Bar (Closed)

最近發現咗一間幾高質嘅餐廳，個位置就咁經過未必會特別留意，但佢地出品真係有驚喜。點咗幾款食物，先嚟餐湯飲住先，我地加$20轉咗酥皮湯超邪惡，酥皮大大覆蓋住湯碗面，督開先知原來係南瓜湯，飲落好甜又creamy啊！餐包好脆仲可以配上鮮蕃茄溝嘅醬，內面有啲蒜所以食落有少少辣，好過癮。其中一個主食點咗烤三文魚配檸檬忌廉汁，超中我口味呢！烤三文魚皮烤得好脆，一切亦感受到三文魚好幼嫩，魚肉食落好腍亦帶魚油香，就係外脆內嫩嘅呈現啊！仲試埋西班牙風乾火腿薄餅，薄餅係薄批底所以食落輕盈啲，芝士同西班牙風乾火腿係絕配，火腿焗完油脂出咗乾脆啲另一種滋味。小食嗌咗兩款都幾有特色，半熟帶子仲保持到鮮嫩係裡頭，串燒雞軟骨好香口有油脂，蘸側面嘅酸辣醬或黑椒汁都好食！另外鵝肝多士只要套餐加$30就可以享用，份量同質素都無欺場。鵝肝一奉上就嗅到好香，食落入口即溶，下面多士十分脆，整體係好抵食啊！飲品好多選擇，我地揀左Peach Flower及Bloody Orange，前者接骨木香好出，後面帶酸味好開胃。