琥酌 (Closed)

話說好彩用open rice訂位，唔訂檯星期五晚walk in一定好晏先有得食。我嚟過呢間店兩次，店外係唔會排長龍，因為根本係全晚full booking，店舖面積唔大，基本上係檯貼檯。我同另一半坐嗰個檯放完兩份定食加一碟小食同一杯嘢飲，只可以放一個爐。由於我哋兩個都係小資打工仔，叫兩個價錢最平嘅吉列安格斯牛肉。餐牌仲有幾百蚊嘅和牛定食供選擇。先講主角吉列安格斯牛，全份肉嘅份量唔細，每片切得厚薄適中，放喺爐上煎十幾秒大概去到5成熟，放入口好嫩滑，好香牛肉味牛肉可以配6種調味料，三種係醬汁，包括燒肉汁、芥末醬、柚子醋，我覺得配醋最開胃。另外有食燒肉成日見到嘅柚子糊椒鹽、海鹽同wasabi，選擇都算多。其他配角亦好好味，飯係有豆加左入去嘅，店員話隻溫泉蛋可以放落去送飯。另外相入面見到有一球同兜仔裝住嘅蟹肉薯泥，加左啲沙律醬，好惹味。左上角嘅白菇啲汁加左少少wasabi，好開胃。牛肉隔離堆椰菜絲加醋食可以爽下個口解下膩。我地叫左個小食芝士釀雞翼（相中綠色兜），初時以為釀左啲芝士入雞翼，原來係芝士鋪面，都幾好味嘅，唔會好漏。我仲叫左蘋果乳酸梳打，唔太甜，亦唔會有藥水味，可以refresh下👍🏻