茶茶台式料理 (Closed)

放工約朋友出旺角食飯，諗起呢間台式小店食物唔錯，價錢都合理，於是去咗食。最鍾意食芝士肉鬆蟹柳蛋餅，平時去台灣旅行一定搵一兩朝食蛋餅做早餐。今次蛋餅入面既芝士肉鬆蟹柳好豐富，而且嗰皮好薄，面頭有啲白芝麻，好香，下次會encore！牛肉麵啖湯味道濃郁，加埋啲酸菜好正。牛肉有四大舊，份量好夠，煮得好淋，而麵質彈牙，份量好夠，食完好飽。朋友喺門口被外婆炸醬麵張相吸引，所以點咗。嗰麵上枱時仲有熱騰騰既煙霧，朋友話碗麵唔太油膩，感覺健康！小香腸拼鹽酥雞粒都唔錯！印象中台灣香腸偏甜，對不特別嗜甜嘅我唔係好啱胃口。但呢度嘅小香腸調味適中，既冇一般台灣香腸咁甜，亦冇茶餐廳既廚師腸咁重口味。鹽酥雞粒外皮又薄又脆，唔會感覺喺度食緊很厚的麵衣，正！