臺茶•薈 (Closed)

同台灣控既女朋友係假日去左維園個度打場波，打完就行左去天后個邊見到食台灣野既臺茶·薈既食店，二話不說就入左去食。一入去，你會見到靚仔店員係bar枱度整食物同台灣飲料。樓面雖然唔算大，但原來有兩層架，都坐滿左唔少食客。我地睇完個menu之後就叫左煎蠔餅 (HKD 35)，鹽酥雞扒 (HKD 30)，紅燒牛肉麵 (HKD 55)，滷水拼盤 (HKD 39)。飲品就叫左珍珠奶茶 (加HKD 17)同埋芋香珍珠奶茶 (加HKD 5)。先黎既係個蠔餅，分量適中，唔油膩，仲有好多蠔添，食落去口感唔錯，台灣風味十足。跟住黎既就係鹽酥雞扒，外脆內軟，雞肉都幾稔，味道十足，但唔會覺得好咸，正。跟住就係個滷水拼盤，有豆腐，滷蛋，雞翼，豬耳同豬肉。樣樣食物都滷水味十足，我個人黎講比較鐘意佢既豬耳同豬肉。佢個豬肉好稔，味道甜甜地咁，口感唔錯，豬耳就非常爽口。佢既紅燒牛肉麵係主打菜，我覺得個湯底唔錯，夠濃味，牛肉有入口即溶既感覺，蘿蔔幾爽口，麵條粗幼長度都啱啱好。難怪呢個係佢地signature dish之一。至於珍珠奶茶同芋香奶茶，我覺得各有特色，最重要係夠多珍珠同好彈牙。