富景清香麵家

Open Now

Now Closed

放假一行三人喺朋友屋企打機睇波，原來時間都唔早🌘，就喺附近買啲嘢食，剛好有間粥麵店「富景清香麵家」開到好夜。雖然差唔多成十點，但都仲有好多人食緊。小店環境OK嘅，唔算太窄，但都係買返去嘆冷氣慢慢食舒服啲🥡。店員姐姐仲建議我哋加一蚊分湯，唔好整淋啲麵。牛腩牛筋河($45)，餸同粉嘅份量，可以話係一比一。🥩牛腩肉味濃郁，肉質唔嚡，但部位就偏肥少少；而牛筋就彈性滿滿。河粉幼身，並無碎濕濕。一鳴雲吞麵($32)，🥟雲吞大大粒，入面包裹原隻鮮蝦，真材實料，如果冇記錯應該係有五粒。另外，幼麵分開上，保持口感，鹼水味亦可接受。茘灣艇仔粥($25)，🍚粥底綿密，唔稀唔糊，好夠味兼且足料，包括魚片、瘦肉、魷魚、花生同蔥等，每啖都有餸配。凉拌黄瓜拼海蜇($38)，小食份量好多，海蜇脆卜卜，而墊底嘅青瓜亦同樣香口🥒。調味帶麻油香，辣辣哋，幾醒神。雞蛋肉碎蒸米粉($25)，蒸米粉有驚喜，口感煙靭，而且簡單加啲蔥同芹菜，味道清清哋唔錯。上面仲有一塊窩蛋肉餅，相當惹味🍳。鮮蝦腸粉($25)，腸粉喺餐廳手拉，口感幾滑，不過就略嫌啲蝦唔夠大隻🦐。油條($10)，呢個正正常常，今時今日一條油炸鬼賣十蚊都唔算貴🙈。總括嚟