La Casa Burger & Pasta (文咸東街) (Closed)

La Casa係一間主打漢堡同手工意粉嘅小店，幾年前已經食過覺得唔錯，今次黎開哩度做野，就喺倒買埋外賣晚餐先走。其實喺政府禁6點後晚市堂食之前一個星期，La Casa已經因為疫情而全日只做外賣，不過喺等外賣其間，發現佢地嘅生意都冇太大影響， 因為真係幾多人黎買外賣， 有自取亦有經外賣平台，不過就只有外賣自取滿$80先有全單8折優惠。黑松露野菌闊條麵($95) - 闊條麵離遠已經聞倒好大陣黑松露香味，麵質比較薄身，食落幾creamy，中間都有好多野菌同黑松露碎，味道唔錯，食完都比想像中飽肚。脆薯角配藍芝士醬($35) - 以哩個價錢薯角份量都幾多，外賣薯角都仲有啲脆，藍芝士醬唔會太鹹，不過質地就比較水，我自己就鍾意蘸返茄汁多啲。脆炸蝦棒 - 炸蝦棒唔會太油，食落都幾脆，炸漿唔會太厚太硬，味道都可以。朱古力雪糕奶昔($45) - 奶昔打得幾滑，朱古力味都濃，朱迷唔會失望。雖然外賣味道冇得同堂食比，但味道都唔錯，特別欣賞小店唔理生意受影響，早過政府宣佈一早全日轉外賣，非常有責任感，絕對值得支持。