AGE Cuisine Express (Moved) New Location

呢日去太古行街，朋友帶我到附近一座工廈食飯，估唔到除咗觀塘之外，鰂魚涌嘅工廈都有好野食。朋友表示呢間嘅pizza好出色，佢個餐牌pizza嘅款式都有唔少，最後揀咗個全新口味「和牛pizza」，再加個海膽意粉，甜品要咗蘋果撻。秘汁和牛pizza（$182）- 好香好好味，材料包括有和牛、芝士、車厘茄、洋蔥、菠菜等，配海鮮醬，甜甜酸酸，味道好夾好惹味。另外要讚一讚，pizza個包底整得好脆。海膽、香煎帶子海鮮汁意大利粉伴香蔥蛋醬（$158）- 帶子同海膽都好鮮甜，個sauce好creamy，意粉好滑，呢個意粉我都俾好高分。意大利芝士蘋果撻（$62）- 有少少apple crumble 嘅感覺，蘋果配埋士多啤梨同奇異果，食落好香甜，撻皮亦做得鬆脆。小店環境同食物質素都好好，裝修佈局以佈局以木系為主，感覺好休閒，啱晒幾個朋友上嚟傾吓計食飯。餐廳亦有做外賣及提供到會服務，外賣自取更有85折優惠，住向附近又或者响附近返工嘅朋友可以試吓。