四季文昌 (Closed)

首先要讚一讚係店舖裝修幾特別，檯同檯之間有空間，唔會太迫。入到去坐低無耐有個著Asahi制服嘅店員問我哋飲咩，咁就好直接話藍妹(唔係唔想幫佢買，而係我哋兩個都唔飲Asahi)，嗰位店員竟然答我藍妹唔凍。我都估到佢有蠱惑，就話轉頭先再叫。到到落單叫食物時，問另一個店員藍妹係咪唔凍，唔凍就唔要，點知佢送上嚟嗰支藍妹係！凍！嘅！sell Asahi嗰位都係想賣多一兩支啫，使唔使講大話話唔凍啊？印象分已經大打折扣，好蠱惑。落完單，好快啲嘢食已經上晒枱，有個店員將個湯底煲放低咗，但又唔幫我哋撳掣開爐，又無指引話要煲幾耐，放低咗個煲就走咗去。舉手叫人過嚟幫手，一係扮見唔到，一係無端端應咗其他客，次次都要大叫先有人嚟，真係好唔醒目嘅服務質素。本來想叫有個著西裝嘅經理反映吓，但係態度都好差，即係講多都嘥氣。所有staff除咗一個skinhead戴耳環嘅男仔有用心serve過我哋之外，其他嘅都唔知做乜。乜而家香港嘅服務性行業變得咁差質素？我唔係無畀加一服務費喎？其次講一講食物，叫咗半隻椰子雞，牛肉拼盤，豆苗肧，烏冬。湯底似清湯加幾片椰肉落去，雞唔嫩，牛肉唔新鮮，係得個菜有得自己收割幾特別，但係份量太少。