牛匠石燒 (Closed)

人生第一次一路食飯一路寫食評今晚訂左枱 7點食飯，條街勁多人，但一入到去只見到得一枱客，心諗可能訂左枱未到啫。安排入座 ，座喺門口位，開門閂門會勁大風，明明好多枱，唔明點解要安排呢張。個侍應發現我周圍望就問我係咪想換枱，我話係，佢就換左張喺入啲嘅枱俾我。呢度係電話 scan qr code 落單。叫左個 2人餐，有燒肉，有沙律，有清酒大蜆 ，有鹽燒虎蝦，有烏冬同甜品。落完單 5分鐘左右，沙律上，好精緻，個沙律得啲椰菜絲，掂👍🏻唔夠 2分鐘就上個鹽燒虎蝦，呢個冇特別。相隔唔夠 1分鐘就上個清酒蜆。再隔唔夠 1分鐘就上埋個烏冬 😨使唔使咁快手？啲肉都未上就上烏冬？心諗好明顯係趕客啦！到主腳出場，啲肉冇特別，有啲啲嘅肉味。燒燒下嘅途中有個女侍應疑似覺得我哋燒得慢，就話幫手燒，我一口拒絕左，因為忙緊打食評 🤣當夾起最後一塊肉嘅時候，女侍應隨即埋嚟問加唔加肉，你咁樣趕客法，我仲點加。我一話唔加，即刻收爐收埋其他嘢，效率之高係而家香港餐廳唔會見到嘅。全程出菜極快，冇次序咁出，擺明就係迫你嗱嗱聲食完即刻埋單走。既然係咁，我都好快咁食完就走人，以後唔使錢都唔日再嚟食。