幸屋

Open Now

Now Closed

之前聽係金鐘返工嘅朋友推介一間係機利臣街嘅日式拉麵小店，質素幾高之餘，價錢又唔太貴，今日終於食到！大概兩點去到都full house，要等一等位，店內裝修簡單，牆上面貼住主打拉麵款同menú，幾有日本小店味道！舖頭座位唔算太多，有分長枱同面牆吧枱。坐低就會送上煎茶茶包同熱水，再慢慢揀嘢食。和風餃子（$38）小食我哋揀咗煎餃子，個皮煎到脆，表面淋咗自家製餃子汁、沙律醬、木魚絲同蔥，內餡係白菜豬肉，好多汁同惹味！黑蒜濃厚山藥豚骨拉麵（$88）兩大塊叉燒加上特製肉醬、溏心蛋、木耳、蔥、椰菜，上面再淋上黑蒜油同白芝麻，湯底係博多風格嘅豚骨湯，濃稠又好香蒜味，拉麵口感揀咗硬但比想像中軟身。叉燒幾軟腍，值得一讚個溏心蛋，入味又超滑！蝦汁帆立貝沾麵（$128）朋友推薦必點之選，有兩大粒燒帆立貝、豚角煮、櫻花蝦同其他配料，沾麵蝦汁以燒熱石鍋上枱，聞落好鮮好香！麵條可以揀冷或者熱麵，麵條較普通拉麵粗身同煙韌，蘸沾汁會掛湯，蝦汁鮮甜但又唔會過鹹，就算食曬成碗都唔覺膩！最後甜品有紫薯栗餅，鬆脆餅皮入面包住香甜紫薯同栗粒，係唔錯嘅飯後甜品！