潮龍清湯腩 (Closed)

喺元朗都住左就快一年，每星期梗會經過呢間鋪頭幾次，但都冇入去食過野，明明清湯腩係我其中一款至愛食品，今日經過，唔肚餓都入左去試下！佢叫潮龍，唔知同其他什麼生龍昌龍等鋪頭有冇關係？唯一可以肯定就係佢同我講個兩間嘅牛腩一樣好味。睇睇餐牌，下午茶崩沙腩河粉賣28蚊碗，加2蚊可以飲雪梨菊花茶，諗都唔使諗，整碗先！再飲左枝雪梨菊花茶。未講碗麵好唔好食前，同大家講下點解我一見倒崩沙腩河賣28蚊碗，就雙眼放光。牛腩呢個統稱係由牛胸至肚底部份嘅一整塊肉，啖啖肉嘅抗腩就係牛胸兩側嘅牛肋肉，崩沙就屬於牛橫隔膜嘅兩側筋膜連肉部份，爽腩就有兩種，清湯腩鋪講嘅爽腩就係透明一塊冇乜肉嘅筋(與崩沙腩部份相連)，但如果去牛肉檔買嘅話，佢地會切舊爽口嘅淨肉俾你。據之前食開嘅清湯腩鋪頭講，叫得做牛腩嘅牛肉，裏面只有大概二成係崩沙腩，不足一成係爽腩，所以好矜貴，價錢貴抗腩成三成。計條簡單嘅數俾大家睇，牛坑腩街市賣約80幾蚊斤，咁崩沙腩（如果買倒的話要話）要110蚊斤，一斤十六兩每兩價值7蚊，三兩崩沙腩價值20蚊有多，雪藏牛腩大概係鮮腩嘅五份三價錢都要12蚊三兩。假設我碗粉有三兩雪藏崩沙腩，淨係牛腩成本，未計粉同埋湯底等等成