梨滿園韓國料理 (Closed)

約咗朋友喺旺角食飯。咁啱天氣突然轉涼，本來想打邊爐，但好似冇乜新意，於是決定去試下鐵板韓國拉絲芝士雞。入到舖頭，地方都幾闊落幾好坐。飲啖茶之後，我地即係叫咗韓國壽司同拉絲芝士雞放題。落完單，店員安排咗6款前菜俾我地，有泡菜，豆角，芽菜同薯仔等等，一次過可以試哂咁多款，好滿足呢。跟住嚟嘅壽司都好足料，入面放滿咗雞肉同蔬菜，重點係有令你開胃嘅醃蘿蔔，配埋豉油同芥末，簡直係為之後嚟嘅拉絲芝士雞做好準備。拉絲芝士雞一出場，全枱都香噴噴。由於有鐵板保溫，基本上10分鐘後，大家仲食到可以拉絲嘅芝士。雞肉亦醃得好香，火候啱啱好，冇因為鐵板加熱令肉質變老。因為芝士雞可以120分鐘任食，我地當然追加啦！嘢食好味又好坐，朋友都決定下次聚舊，試埋梨滿園其他嘢食。