Simplylife Bakery Cafe (Closed)

早排去megabox睇戲, 路過德福見到simplylife, 所以就決定食呢間。下晝一點幾嘅simplylife門口都係好多人, 大概等咗20分鐘先入到去。入面嘅枱都幾迫, 完全無私隱性。可能在場都幾多客, 所以都比較嘈, 同酒樓差唔多, 就算同坐對面啲人講野都要大聲啲。我地叫咗兩個set, 分別係烤美國春雞半隻、車厘番茄西班牙甜椒辣肉腸同埋忌廉蛋汁煙肉手製意大利粉。每個set118蚊, 附送餐湯/沙律同埋飲品, 飲品有冰茶同汽水可以揀。烤春雞嘅醬汁比較咸, 但雞肉煮得啱啱好, 無過熟嘅情況出現。部份烤春雞嘅雞肉比較乾, 可能係醬汁唔太夠。配上車厘番茄食都唔錯, 當食到中途可以食粒番茄解膩。至於辣肉腸就無出現過, 可能係俾漏咗。忌廉蛋汁煙肉手製意大利粉一上菜就聞到好香, 食落亦有極濃嘅忌廉味, 成個意大利粉都好creamy, 如果唔太鐘意呢種咁creamy嘅質感, 可能要飲啖冰茶化解吓。有唔少嘅厚切煙肉佈滿喺意大利粉上面, 多到食到最後仲有一堆煙肉未食。厚切嘅煙肉有一層脂肪, 食落雖然好香, 但會充滿罪疚感, 減肥人士勿點。