君悅咖啡廳

Open Now

Now Closed

今次係第三次去食dinner buffet，因為慶祝生日，所以好想食！上一次食已經係2016年，隔咗幾年再去，質素依然令人滿意。我哋坐喺近窗位置，唔近食物枱，但我覺得都ok，個景開揚啲。6:30pm去到都唔多人，但坐坐吓就已經滿坐，所以就算平日去都係訂位先隱陣。我哋第一樣去攞嘅就係燒鵝同海南雞，因為男朋友記得佢嘅燒鵝髀係有限供應，所以一定要去攞左先。我就拎咗海南雞飯加3件燒鵝髀，廚師將燒鵝放落個爐道熱一熱先再俾我。燒鵝有啲肥，都幾香，但皮唔脆。海南雞係滑嘅，如果油飯再香d就更好食。之後就開始食凍海鮮，龍蝦正常，青口好大隻，幾嫩滑。刺身我話每款都要，廚師俾咗每款三片，好多！全部都幾好食😋。當晚嘅燉湯係黨參燉烏雞，好甘甜，好飲。最好食係鵝肝多士，每塊鵝肝有成8cm左右咁厚，口感嫩滑，夾埋件甜梨食，超正，食咗兩件。😋😋燒牛肉就個邊乾咗，中間位都嫩嘅。甜品我飲咗碗雪耳雪梨糖水同埋食咗件榛子拿破崙，兩樣都唔錯。最後侍應捧上生日蛋糕，細細件外型唔算好出色但勝在朱古力mousse好香滑。熟食隔離仲有檸檬茶可以任飲，茶味夠濃。全晚食物總括嚟講都好食，係我個人最鍾意嘅自助餐餐廳。