水門雞飯 (百宜樓) (Closed)

同男朋友喺元朗行完街，想搵餐廳食飯，路過呢間水門雞飯，見唔使排隊就入去試吓。入面環境唔算大，多人時有機會需要搭枱。餐廳入面坐圓椅，唔算好舒服，但都OK嘅。店員做嘢迅速，態度有禮貌，落咗單一陣好快就有得食。我叫咗一碟水門雞飯$50，同埋一杯檸檬梳打少冰。水門雞飯入面雞嘅份量都多，同埋佢係冇骨嘅雞肉，食得勁方便，飯係油飯黎，多到我食唔晒。我幾鍾意佢嘅秘製辣汁，唔算好辣，因為我唔想太食得辣，但呢個辣度我接受到。我覺得都杯檸檬梳打都幾大杯，食埋個飯之後再飲埋呢杯野，真係好飽。男朋友叫咗一碟水門炸雞飯$50，加咗雞雜$10，同埋一杯泰式奶茶。水門炸雞飯嘅雞份量都多架，炸得鬆鬆脆脆，幾好味。雞雜就有雞紅、雞潤、雞腎。因為漏咗單，所以雞雜係另上，如果唔係應該會同碟炸雞飯同碟。男朋友都幾鍾意呢杯泰式奶茶，佢話同平時飲嘅茶餐廳奶茶有分別。兩個人叫嘅嘢食叫得唔多，所以下次可以同朋友一齊再去，咁就可以叫多啲其他食物啦。因為都想試吓佢啲串燒、豬頸肉、金邊粉等等。