TC2 (Tea Coffee Two)

Open Now

Now Closed

早幾年有段日子間中會去太子間 TC2，嗰度由幾個傳媒人開，所以成日都有同行幫襯。除咗食嘢，又試過喺嗰度聽音樂會，感覺好 chill。太子店結業之後，TC2 就剩番新蒲崗店。近排經常到呢區工作，終於有機會一試。新蒲崗店同太子店分別好大，呢度裝修都幾殘舊幾簡陋，應該主要做外賣，堂食全部都係吧檯位，坐得唔算舒服。不過一睇 menu，食物飲品平到笑，所以即使冇乜裝修，又有咩關係呢😂？我叫咗個套餐，包括鮮果沙律，芝士吞拿魚三文治同咖啡。先嚟個沙律，好大盒，入面有蘋果，雪梨，菠蘿同粟米，全部用沙律醬撈勻，超鍾意生果嘅我食得好 enjoy。三文治用咗麥包，入面除咗芝士同吞拿魚之外， 仲有蕃茄同青瓜，所有食材味道正常，唯一係吞拿魚撈咗沙律醬，味道偏酸，如果用蛋黃醬應該更好。呢個餐最正嘅肯定係杯咖啡，又香濃，口感又幼滑，真心高質👍。成個餐四十蚊有找，好抵食。