麺屋武蔵虎洞 (青衣城) (Closed)

去青衣睇完戲，想食餐飯都咁難……青衣城2期食肆已經迫爆，轉戰一期都差唔多，最後家人話食拉麵就諗起麵屋武藏。幾年前食過都算唔錯，今日食就差咗好多吓喇！麵屋主打赤黑白湯底，赤係味噌湯底，白係豬骨湯底，黑係蒜油湯底。我哋一行三人都點咗黑武骨豚角煮拉麵，限定松茸叉燒拉麵，黑武士沾麵，唐揚炸雞，另追加一份豚角煮。首先係炸雞，基本上同坊間嘅日式炸雞一樣，不過不失咁啦！係個沙律醬改成 washabi 芥末沙律醬，食起嚟冇咁膩又刺激啲！拉麵湯底方面，黑蒜油湯底非常油膩，睇相都飽飽哋，但飲落去出奇清淡冇乜蒜味喎！赤麵湯底就好啲，少油啲，味噌難得啱啱好。而我點嘅松茸湯底就松茸味唔太出，只有濃厚嘅雜菌味。麵質方面有粗幼兩款，湯麵配幼麵，沾麵配粗麵，抵讚嘅係麵淥得啱啱好！配菜方面，叉燒每碗有兩大塊薄片，叉燒經過長時間鹵煮，肉質軟嫰，味道鹹中帶甜！豚角煮即炆燉五花腩，脂肪燉煮到入口即溶，鍾意食扣肉，東坡肉嘅朋友應該非常喜歡！最後要講吓服務方面，店面員工得兩位，而且係身形嬌小嘅美女，但服務勤快，笑容可掬，落單，送餐，添加茶水，執枱可以講係快而準，今日所有正評都屬於佢哋嘅！