波士冰室 (Closed)

近年流行冰室，開到成行成市。感覺上冰室都走懷舊feel，地方乾淨企理啲，價錢又貴啲。雖然食物款式比茶餐廳少，但質素上比較精緻啲。所以深受後生仔歡迎。今日行開荃灣，一於去試下波士早餐先。早餐 (B)珍珠帶子火腿通粉，配滑蛋厚多士。味道同坊間差唔多，冇驚喜亦冇驚嚇。滑蛋蛋味幾濃，配剛烘嘅牛油厚多士，絕。早餐(F)西冷牛扒併雞肉腸，配櫻花蝦滑蛋厚多士。西冷牛扒係比較廉價嗰種，比BBQ牛扒好少少。雞肉腸係廚師腸，感覺同連鎖快餐店嘅早餐差唔多。唯有期望吓個櫻花蝦滑蛋啦！點知原來係响普通滑蛋加少少櫻花蝦乾咁，味道亦冇乜分別，真係白期待喇！早餐(G) 沙爹鮮牛肉麵，配滑蛋厚多士。沙爹味道濃郁，有別於坊間茶記味道。而且份量足，配埋滑蛋多士加餐飲，給予勞動人口一日嘅動力。食物質素尚可，但不得不提係環境安全問題。座位旁邊有「波士冰室」嘅鐵片做阻隔，但可能日久失修，個「波」字中間嘅鋒利鐵片已經飛出。一個早餐時間，我隻手俾佢刮咗兩次，件衫俾佢又刮咗幾次。真係好危險，希望店家及早注意一下啦！