篤篤車 (Moved) New Location

香港其實都有唔少地道小食，而車仔麵不嬲都係我嘅 (其中一樣) 至愛，貪佢又平又抵食，又有得揀唔同嘅材料，平時如果食清湯，又可以加腩汁或者沙嗲汁，但講到底，都好考廚師整個湯底嘅功力。成日都想約朋友去試下篤篤車，但係唔係個個朋友都肯陪我入元朗。等到今日終於約到朋友同我一齊去試啦！我哋一人叫咗一個非常之泰式嘅湯底，一個係冬陰公湯，另一個係鱷魚骨湯。隱約見到廚房有兩位應該係泰籍嘅廚師，令到我對呢兩個湯底非常之有期望，始終泰國人做泰式風味一定比起香港人出色（我估，應該係咁）。冬陰公湯底可以揀唔同嘅辣度，朋友叫咗小辣，但係都幾辣下，不過要食正宗嘅泰國嘢，點可以唔食得辣呢？飲咗一啖湯，覺得十分之惹味，美女同埋喉嚨有一股慢慢滲開去嘅辣，而且都幾持久。湯底嘅味道香濃，一啖湯一啖面，食落十分之過癮。鱷魚🐊骨湯底係香港真係未試過，而我去泰國嘅時候都未試過哈哈！飲落似係好鮮味嘅魚湯，一啲都唔可怕，不過我朋友就唔敢試啦，我自己一人獨食哈哈！