康瑞涼茶 (Closed)

因為香港無我心愛既鮮芋仙，香港又極少有質素既芋圓甜品。所以康瑞涼茶絕對係我係香港係芋圓既首選。由之前係中醫館4點後轉買芋圓我已經開始幫襯佢。好彩老闆搵到新鋪位"發大"黎搞，而家全日都有得食到啦。<特式仙草百配配芋圓、地瓜圓、小丸子>， $25，呢個絕對係皇牌之選，抵食到爛!特式仙草百會配淡花奶，係用尼配咖啡果種細杯裝淡花奶。有朋友問侍應可唔可加花奶但侍應話一份特式仙草百只可以配一杯花奶，如果要多花奶就要加一蚊比多一杯。仙草好滑配埋花奶甜甜地但又唔會過甜，味道好配合。而芋圓同地瓜圓就好有咬口好彈牙。一份特式仙草百配入面有好多種配料，首先一定有多到數唔晒既芋圓、地瓜圓同小丸子，之後仲有主角之一既仙草配西米、紅豆、薏米、珍珠。每一種材料都有好多，連我咁為食都滿足到。<糖不甩>，$18，因為見到Menu寫住糖不甩係秘制，所以都叫左一份一齊share。一份一共有6粒，不過略嫌水份太多，糖不甩唔同夠煙韌。整體黎講我都係覺得佢地個<特式仙草百配配芋圓、地瓜圓、小丸子>係香港係無敵，因為無一間可以性價比咁高而又咁高質素。