渣哥一九九六 (Closed)

啱啱同阿肥食咗一個好甜嘅下午茶,雖然已經有啲飽滯不過都想食番小小咸嘢緩和吓,一諗就諗到不如齊齊篤番串魚蛋啦。 喺銅鑼灣區,如果唔想食龍津嘅話,呢間渣哥已經係比較有名氣喇,我都知佢係譚小環一手創立,都有留意過新聞話佢都付出咗唔小努力去建立呢檔生意,開咗冇幾耐我都一直冇試過,就係好怕呢種明星效應明過於實...但最近見佢喺不同地區都開咗分店,而都繼續有人支持,咁應該一試無妨。 行到去門口見店舖除咗賣魚蛋之外,原來都仲有好多其他小食同埋連台式飯都做埋,睇嚟要賺錢真係要多元化吸引客戶,見佢魚蛋賣$10蚊八粒,都唔算過份貴丫,一於就同阿肥一人一串,我要辣,佢要唔辣。 試過之後,真心覺得佢個辣汁係做得幾出色同埋夠惹味嘅,亦都有佢自己嘅character唔同普通旺角掃街嗰種辣汁味,之但係魚蛋嘅口感實在拉低哂佢嘅分數喇,口感唔彈牙,咬開比較粉,唔係鮮嗰種魚蛋,如果店舖可以換一換貨源,可能會較好。