養心殿台式養生鍋 (Moved) New Location

班同事前幾日見到養心殿午餐時段做半價優惠，所以約埋啲舊同事一行八人齊齊星期六晏晝打邊爐。去到餐廳，未齊人都入得，又唔駛等位，佢仲安排左張大圓枱比我地添。但部分位置係風口位，最好帶多件褸去(但要預左件褸索味)。我地叫左兩個鍋，美人鍋同薑母鴨鍋。我見美人鍋既料有椰子，成隻烏雞，紅棗，黨蔘同杞子。薑母鴨鍋就有鴨件，荀，腐皮，薑同豆腐。淨係衣兩鍋湯已經好好飲，又足料。每人飲完兩碗淨湯之後，仲可以叫侍應再加返兩款湯添架。之後我地叫左萵荀，鴨血，百頁，雪花肥牛，三款餃子，豬肉片，老油條，手打丸同響鈴。啲手打丸好新鮮，又有咁多款味，又彈牙。必食 ! 啲雪花肥牛賣相好靚，食落牛味濃，一啲都唔覺肥。咁岩我有啲同事唔食牛，所以我地仲叫左豬肉片，食落唔覺肥，又唔會un ，都唔錯。餃子我反而覺得普普通通無乜特別姐。我都係第一次食老油條，硬掘掘咁，始終係油炸過，食落都覺得有啲油膩感。響鈴都夠脆，但一蘿響得果四條，唔夠我地八個人分，要叫兩蘿先夠。豬紅我就食得多，食鴨血我都係第一次。食落去有啲煙煙UN UN，比起豬血，鴨血有感好多。我地食左差唔多三粒半鐘掛住傾計都無人出聲趕我地走，都唔錯。